APRESENTAÇÃO
 
Néno, Macau filo, tâ vai contá
lenga-lenga di Macau
 
na-más estória, iou uví falá
nâm sã treta, boboriça,
nunca sã pantominice
 
Memória antiqu nâm faltá.
Nôm querê ma-língu,
nunca sã boca tanto
 
Sã papel vêlo que já gafinhá
sã foto que já vasculiá,
aucunza que já olá, papiá,
uví vêlo-vêlo chuchumecá
 
…Iuo nadi esquecê
…Aia! qui saião
                            26.12.2011
 
Neno ta vai conta, nôn sâm p´a brincâ
 
Ung´a ano já passâ
Estória, posia, livro, pintura
Tanta coisa vêlo iou já gafinhâ
Cantinela, rabucénga, cinematógrafo
Tánto-tánto papel já rabiscâ
Bugiganga, boboriça, florestia
Tim-tim pa tim-tim tudo já explicâ
 
Sã lenga-lenga di Macau
Nadi ezazerâ
……………………..e nadi isquecê
Sã verdades, nâm inventaçam
Macau di nosso coraçám
……………..….nosotro mui querê
 
Gente-gente batê palmas
Fila-Fila  querê mais,
……………………….…..vasculiâ
Nhum Nhum agradecê
Otrong´a bóca grándi sem vergónha,
…………………………..já copiâ
 
Iou logo vai gardecê vosotro
Chuchumecá estunga blogê
Iou prometê, logo capaz labità,
Falâ vai, falâ vem… isquevê
                         26.12.2012
 
OTRUNGA ANO
Ôlo batê -batê  lógomente
Sentá-sentá unga ano más …
N´unga dia, muto tanto livros procurá,
papel vêlo, chuchumequices, registá,
cusa laia-laia di Macau, virâ vê.
N´otrunga dia, notícias, estórias rabiscá,
tipâ computador, caprichá,
        nenotavaicontá isquevê.
Já sandê três velas e suprá,
nuncassá gabarolá.
Minino Néno nã más gatinhá,
já sã capaz sózinho andá.
Masqui séza pichote
sã capaz di crescê más grandi
querê más inspiraçam
Assi azinha-azinha muto pedi
corrê por pivete no pagode
vai igrêja rezá oraçamHoze, sâm dia di festa
P´ra estung´a bôm filo di Macau
                26.12.2013
 
HOZE SÂM DIA DI FESTA
Um ano más, azinha-azinha
Já acabá.   …     Otrung´a ano …
Chega Natal, assi azinha
nenotavaicontá
Fazê festa de fechá anoOtrung´a ano más… e sã assi
Iou agradecê muto vôs companhâ
Vôs leitura, vôs coraçam grándi
Iou muto tanto quelê
Más e más gente olâ, priguntâIou vai continuá, destung´a laia
Revelá Macau pra muto gente
Pra vôs estunga jornaleco laia-laia
nenotavaicontá
Festejá muto tanto contenteNôs nâm sã bafo di âde
Chegâ—ora, ung´á estória divulgá
Iou querê só larga bagáte
P´ra vôs, olá tudo-óra
nenotavaicontá
                26-12-2014

HOZE LEMBRÁ FAZÊ ANOS
Chai-chai nenotavaiconta
fazê anos, hoze lembrá
quatri anni já tem.
Dia filiz, dia di  festa
soprá vela, lôgo cantá

Estunga blogue
divera já  crecê.
Papiá vêm, papiá vai
dia-dia já postá unga màs.
Iou nádi isquecê.

Sã  muto post,
Iou tudo ta vai notá.
Pegá livro, fólia, image,
pôe ôclo grôsso-grôsso
Pã fazê todos lembrá.

Muto quebrá cabéça
tim tim pa tim tim já ixplicá.
Destunga laia neno torná crescê
muto tanto más bom.
Otrung´a ano começá.

26-12-2015