Unga áno intrementes ta sai
Logomente otrunga ta goelá
Áno vêlo ta virá costa vai,
Áno novo qui azinha ta intrá.

Vida azinha-azinha corê
Sã dia co mêz ligéro passa.
Gente antigo, susto di morê,
Pensá qui Mundo ta perto cavá.

Pôde vai co diabo, bicho traquino,
Áno oitenta quatro savanado.
Lembrá rabixá um-cento-mufino
Pa azinha aguá co vôs juntado.

Olá êle batê asa aguá,
Nôs sintí qui mundo nádi saiám;
Tudo pau-chông qui gente lô quimá
Sã pa mundo nom têm consumiçam.

Quim ta ánsia vai zavaná azar,
Quim ta sacudi vento-suzo mau;
Ancuza galado, pinchá na mar,
Pa tirá saván di nosso Macau.

Áno vêlo, vôs bêm di buliçoso,
Já bulí co nôs na estunga vánda.
Vôs já fica unchinho ma-peçoso,
Sã merecê Chacha-sa sarabanda.

Calistro, ispalhá fome na mundo,
Trazê qui tanto lágri di margura.
Esperánça di bom dia já vai fundo,
Inguiçado pa um-cento diabura.

Qui di ódio crecê na coraçam
Di gente qui vivo dizesperado
Na unga mundo fêto di vilám
Co assi tánto pobre escravizado.

Nhu-nhum ta rico querê más riqueza,
Nom-têm fim di olá saco inchido.
Gente pobre sã morê na pobreza,
Cavá passa su vida consumido.

Tánto inocente onçôm pagá
Pecado di nhu-nhum dismazelado.
Qui vêlo, qui quiança já definhá,
Na casa-casa qui nom-têm telado.

Áno novo, lembrá trazê bom vento
Pa pôde suprá mufinaze vai,
Nunca-bom intrá co pê azarento,
Pa fazê mundo tropeçá pê cai.

Vêm co paz pa nosso gente sofrido;
Pa quim fome, ne-bom isquecê pám.
Vêm co frescura di jardim florido,
Vêm com amô pa tudo coraçám.

Pa tud´alma qui ta vivo na treva,
Sandê unchinho di luz pa lumiá.
Pa tudo coraçám qui sã ta reva,
Vêm passa páno mimoso limpá.

Co graça di Ceu, vôs vêm raganhado,
Pa ispalhá amô, paz co bondade.
Vêm fi, fica justo, abençoado,
Pa tudo coraçám di bô vontade

José dos Santos Ferreira (1)
31 di Dizémbro di 1984

(1) FERREIRA, José dos Santos – Macau di Tempo Antigo. Edição do Autor, Macau, 1985.